O Concello recupera o estanque de Méndez Núñez, totalmente renovado e no que desde hoxe volve haber peixes

A alcaldesa da Coruña, Inés Rey, visitou hoxe a fonte e estanque dos xardíns de Méndez Núñez, estanque que vén de ser renovado e acondicionado polo Concello e no que dende este mércores, volve haber peixes de auga doce. Un grupo de nenas e nenos de educación primaria do CEIP Rosalía de Castro liberaron hoxe 50 exemplares de pez dourado que xa forman parte de novo da estampa dos xardíns, e que serán atendidos polos servizos de Medio Ambiente. A recuperación do estanque é unha iniciativa máis do Goberno de Inés Rey dentro do seu proxecto de recuperación integral de Méndez Núñez.
“Unha das primeiras decisións que tomei como alcaldesa foi a de promover a recuperación integral destes xardíns, un espazo incardinado no centro e no corazón mesmo da nosa cidade. Un espazo que, malia o seu relevante emprazamento, estaba descoidado e tíñase convertido nun lugar de celebración de botellóns”, explicou Inés Rey.
Rey promoveu a declaración dos xardíns de Méndez Núñez como Zona de Especial Protección (ZEP), acabando coa práctica dos botellóns nese espazo a principios do ano 2020 e poñendo en marcha diversas actuacións para a recuperación do xardín histórico. As intervencións comezaron coa recuperación da Rosaleda, o almanaque floral e o reloxo dos xardíns, renovándose tamén a estatua de John Lennon cunha guitarra floral.
Ademais, o Goberno de Inés Rey devolveu a estatua de Emilia Pardo Bazán ao seu lugar orixinal, tras quince anos nun almacén. A súa recuperación tamén forma parte do proxecto para devolver a este espazo emblemático da cidade o seu esplendor. Nos xardíns, ademais, está en marcha a renovación do Copacabana despois de que o Goberno municipal sacara a concurso dita concesión.
Xogos inclusivos e un novo parque de maiores
O Concello, ademais, renovou completamente os dous espazos de xogos infantís (pequenos e maiores). As obras de mellora remataron tamén e hoxe abriu ao público o último dos parques, o de maiores, no que se incluiu un xogo especialmente deseñado para que poidan facer uso del pequenas e pequenos en cadeira de rodas.